ამა წლის 1 ნოემბერს, სოფელ რუხში, მულტიფუნქციურ სათემო ცენტრ „ჩემი მორდუში“  შედგა ასოციაცია „მშვიდობიანი და საქმიანი კავკასიას (ამსკ) წარმომადგენელთა  და რუხის    აქტივისტების      შეხვედრა,  რომელიც ეხებოდა   მეტად აქტუალურ და მნიშვნელოვან სამშვიდობო და პატრიოტულ  საქმეს-წონადი წვლილის შეტანას   ქართულ-აფხაზური ნდობის მშენებლობისა და შერიგების საქმეში.

ახლა, როცა რუხში აშენებული და ამოქმედებულია საქართველოში ერთ-ერთი საუკეთესო, თანამედროვე სამედიცინო ცენტრი-რუხის რესპუბლიკური საავადმყოფო, რომელიც  უმაღლეს დონეზე და ოპერატიულად ემსახურება  აფხაზეთიდან გადმოყვანილ პაციენტებს, საგრძნობლად იმატა  ამ  კლინიკაში  აფხაზი პაციენტების მომართვიანობამ.  აქ მომუშავე  მაღალი რანგის ექიმები და ხელმძღვანელობა პირნათლად აკეთებენ თავიანთ  საქმეს, რათა  ისინი  ჯანმრთელნი და კმაყოფილნი დაუბრუნდნენ   საკუთარ ოჯახებს, ახლობლებს, საზოგადოებას. მაგრამ არის ერთი სერიოზული გამოწვევა-აფხაზი პაციენტების სტაციონალური მკურნალობის პერიოდში,მათი მომყოლი პირები ღამის სათევი ადგილების გარეშე  რჩებიან.

შეხვედრაზე ხაზგასმით აღინიშნა, რომ რუხელები უნდა დაუბრუნდნენ თავიანთი ისტორიული მისიის შესრულებას, შეახსენონ აფხაზებს ქართული ტრადიციული სტუმართმოყვარეობა-სოფელში შეირჩეს რამდენიმე ათეული ოჯახი (მათი სურვილის შემთხვევაში)  და პაციენტების   მომყოლ პირებს, მათი ავადმყოფის კლინიკაში მკურნალობის პერიოდში, შესთავაზონ  ღამის თევა.

ამ მიზნით, უახლოეს პერიოდში შედგება რუხის მოსახლეობასთან შეხვედრა, რათა მოძიებულ იქნენ მოხალისეები, ვინც გამოხატავს მზაობას, ღამის სათევის გარეშე დარჩენილი აფხაზი პაციენტების  თანმხლები პირებისთვის   მასპინძლობის გაწევის თაობაზე.         

ქართულ-აფხაზური ნდობის მშენებლობისა და შერიგების მიმართულებით,  გვჯერა, რომ რუხელები ამ პრობლემას, როგორც არავინ,  ისე მოაგვარებენ, აღადგენენ დავიწყებულ კავშირებს  და ასობით აფხაზ მეგობარს და ახლობელს შეიძენენ.